– Raúl e Borjamina quedaron abraiados polo tamaño da montaxe e polo logrados que están os personaxes

– Escribiron no libro de sinaturas do nacemento: “Moitas grazas por incluírnos nesta obra tan impresionante e con tanto traballo detrás”

^{Valga, 14 de decembro de 2023.}

^{Borjamina e Raúl, dous dos integrantes do equipo televisivo “Mozos de Arousa”, estiveron onte por partida dobre no Belén Artesanal. Os ‘mozos’ de carne e oso achegáronse ata Campaña para ver as súas reproducións en miniatura, que forman parte desta edición do nacemento, e para agradecer aos membros de Amigos do Belén que os incluíran na montaxe. O terceiro membro do equipo, Bruno, tamén tiña previsto participar na visita, pero un imprevisto de última hora impediullo. Iso si, prometeu achegarse en canto poida.}

^{Os dous irmáns vilagarciáns amosáronse abraiados cando entraron ao Belén e comprobaron as súas dimensións e cantidade de escenas e personaxes que forman parte del. “Véndoo en fotos parece máis pequeno, non imaxinamos que albergara tanto contido nin que o percorrido fora tan grande”. Ademais, “os personaxes identifícanse só con velos e está recollido ata o máis pequeno detalle”, destacaron.}

^{A inauguración do nacemento, o pasado día 3, colleunos fóra de España, pero aínda así as fotos das súas figuras chegáronlles de forma inmediata. “Nunha imaxinamos que puideramos aparecer nun Belén con tanta tradición e ao lado do presidente ou do Rei, pero tampouco pensabamos que o programa (Reacción en Cadena) ía a ter tanta repercusión”.}

^{Sobre as súas réplicas en miniatura sinalaron que “son supercaracterísticas, polas camisas, a posición que temos no atril. Vese perfectamente que somos nós”.}

^{Os Mozos de Arousa estiveron acompañados por boa parte dos membros da asociación Amigos do Belén e polos concelleiros Carmen Gómez e Pedro Calvo, en representación do Concello. Interesáronse pola historia do nacemento, baixaron a foso para ver todos os mecanismos que lle dan movemento, fixéronse fotos coas persoas que llo pediron e asinaron autógrafos. Tamén deixaron a súa rúbrica no libro de sinaturas, xunto coa seguinte mensaxe: “Moitas grazas por incluírnos nesta obra tan impresionante e con tanto traballo detrás. Non podemos dicir nada máis que en hora boa e que merecedes o maior dos éxitos. Por moitos anos máis!”.}